افغان انسانی حقوق تنظیم Rawadari نے افغانستان کی موجودہ صورتحال پر اپنی تازہ رپورٹ جاری کر دی ہے، جس میں سنگین انسانی حقوق کی خلاف ورزیوں کی نشاندہی کی گئی ہے۔
رپورٹ کے مطابق Taliban کی پالیسیوں نے ملک کو شدید بحران میں دھکیل دیا ہے، جس کے نتیجے میں شہری آزادیوں اور بنیادی حقوق کو شدید نقصان پہنچا ہے۔
رپورٹ میں کہا گیا ہے کہ خواتین اور اقلیتوں کے خلاف مظالم میں نمایاں اضافہ ہوا ہے، جبکہ ٹارگٹ کلنگ، ماورائے عدالت قتل اور جبری گمشدگیوں کے واقعات میں 40.4 فیصد اضافہ ریکارڈ کیا گیا، جس سے 611 افراد متاثر ہوئے۔
مزید بتایا گیا ہے کہ سال 2025 کے دوران سخت گیر قوانین کے ذریعے خواتین کے بنیادی حقوق کو محدود کیا گیا، جبکہ طالبان عدالتوں کی جانب سے جسمانی اور تذلیل آمیز سزاؤں کا نفاذ بھی جاری رہا۔
رپورٹ میں یہ بھی کہا گیا ہے کہ نسلی و مذہبی اقلیتوں کو روزگار اور بنیادی سہولیات سے محروم رکھا جا رہا ہے، جبکہ آزاد اداروں اور خودمختار عدلیہ کی عدم موجودگی کے باعث انسانی حقوق کی خلاف ورزیوں میں مزید اضافہ ہو رہا ہے۔
ماہرین کے مطابق یہ صورتحال افغانستان میں انسانی بحران کو مزید گہرا کرنے کا باعث بن سکتی ہے۔
